Уметничко-ликовна дејност

НУЦК „Антон Панов“ располага со два изложбени, галериски простора. Едниот, поголемиот, се наоѓа во десното крило на НУЦК, спроти канцелариите на Уметничката галерија. Вториот, помалиот, се наоѓа во просторот на фоајето. Обата галериски простора нудат одлични можности за изложување уметнички слики, скулптури, отворање на индивидуални или групни изложби. Со доволно голема површина, тие се места каде се собираат уметниците од земјата и од странство, како и посетителите, љубителите на уметноста преку текот на целата година.

Кон крајот на 50-тите години на 20 век Кочо Урдин, познатиот струмички и македонски писател, остварувал повеќе контакти и средби со сликари од просторот на тогашната држава Југославија. Од нив набавувал слики за да направи една уметничка збирка во Работничкиот универзитет „Јоска Свештарот“ во Струмица, чиј директор тогаш бил. По некое време тие свои патешествија ги заменил со тоа што ги повикувал сликарите да престојуваат во Струмица. На тој начин во летото во 1963 година е формирана Струмичката ликовна збирка. Почетната идеја била на едно место да се соберат и преку изложба да се дадат на показ ликовните дела што дотогаш биле откупувани или подарувани од сликари, општествени организации и сл. Во тоа време се зародила и идејата да се организира ликовна колонија во Струмица, во Работничкиот универзитет. Првото издание на Колонијата требало да биде во 1963 година, но поради земјотресот во Скопје, било одложено. Веќе во следната 1964 г. година, во август месец, се случила првата Колонија. Еве како во еден свој запис се сеќава на тоа време Љупчо Апостолов: „Кога дојдоа од сите страни во Струмица, беше август 1964. Чудно изгледаа. Облечени шаренолико, шумни и весели, на секој чекор го свртуваа вниманието. Ги гледаа луѓето, сомнително вртеа со главите и се прашуваа: кои се овие необични суштества и што бараат овде во ова мало јужно гратче“?

До 1966 година учесници на Колонијата биле сликари без академско образование и сликари кои ја негувале наивната уметност, а од таа 1966 година на Колонијата почнале да учествуваат и академски сликари од Југославија. Од 1969 година Колонијата станала меѓународна и на неа почнале да учествуваат уметници од целиот свет. Во речиси шеесетгодишното постоење на Меѓународната струмичка колонија низ неа како гости и учесници поминале многу значајни имиња и од Македонија и од странство. Некои од нив се: Боро Митриќевски, Стојан Пачоов, Тане Луловски, Симон Шемов, Ниче Василев, Ана Темкова, Ганзафер Бајрам, Мартин Хегедушиќ, Рубенс Корубин, Трајче Јанчевски, Глигор Беќаров, Петар Мазев, Чали Јашар, Драган Лубарда, Цане Јанкуловски, Глигор Чемерски, Миле Корубин и многу други.